利物浦日前喺英超4比3绝杀热刺，不过领队高普就非常火爆，赛後怒轰执法球证保罗泰亚尼「针对利物浦」，一直以来对利物浦充满敌意。呢番言论引起英国球证协会极大反应，主席卡斯迪更要求英格兰足总对利物浦扣分，以严惩嚟压制批评球证嘅风气。

利物浦击败热刺後，高普故意走去第4球证面前庆祝，赛後又批评保罗泰亚尼「针对利物浦」，直指利物浦同保罗泰亚尼早有「牙齿印」。英国职业裁判员公司(PGMOL)赛後己第一时间发声明，话审视过保罗泰亚尼喺执法过程冇任何不当行为，反驳高普嘅阴谋论。

负责提供球证训练同支援嘅英国球证协会，主席卡斯迪就呼吁对利物浦扣分：「除非足总用扣分嚟惩罚，否则(高普)呢啲行为唔会停止。你罚利物浦3万镑系冇意思，只有扣分先会令佢哋收声，我相信扣利物浦分可以杀一儆百。我唔接受用热血嚟帮高普解释，杜格利殊、辛奇利唔热血咩？佢哋都唔会做呢啲咁差嘅行为。」