曼联2年前用7,300万镑(约7.2亿港元)向多蒙特收购翼锋查顿辛祖，但呢位23岁英格兰国脚表现令人失望，佢自己亦意兴阑珊，根据德国《图片报》爆料，查顿辛祖後悔成「魔」，希望重投多蒙特，拯救足球事业。

查顿辛祖为曼联上阵72次仅入11球，相比效力多蒙特期间137次披甲入50球及64次助攻，有天壤之别，呢位翼锋更因为表现差，无缘为英格兰出战上年世界盃决赛周，甚至出现「心理病」，上年年底需要去荷兰接受治疗及训练，直至2月先至重返曼联比赛，但状态始终冇大改善。

据悉查顿辛祖向曼联提出转会要求，佢嘅经理人亦一直同多蒙特总监基尔有联系，最大机会重返多蒙特。由於查顿辛祖仲有3年合约在身，曼联唔想低价出售佢，多蒙特亦无力重金回购，红魔鬼唔排除以外借形式，畀辛祖加盟多蒙特。

另外，养伤一个半月嘅阿根廷新星阿历真度加拿祖已经完全康复，有望於周五(5日)凌晨英超复出，作客白礼顿，随住同属翼锋嘅加拿祖复出，预料查顿辛祖上阵时间又会减少，难怪佢为前途着想，急於今夏转会。