阿根廷球王美斯同巴黎圣日耳门(PSG)关系进一步破裂，根据《队报》等多间法国媒体报道，呢位35岁射手日前擅自离队，前往沙特阿拉伯履行担任该国旅游大使工作，令PSG管理层震怒，决定处罚美斯停赛、停操、停薪，为期两星期。

据悉美斯未得到球会批准之下，飞去沙特阿拉伯「秘捞」，并缺席周一(1日)球队操练，会方周二(2日)立即采取行动，向佢作出「三停」处罚，意味美斯将会缺阵未来2场法甲对特鲁瓦、阿些斯奥。

由於今季法甲只剩下5轮联赛，《队报》直指美斯喺PSG嘅生涯得番3场波踢，认定佢将於今夏约满离队。

由於PSG要求美斯减薪，令到双方续约问题陷入僵局，加上自从世界盃之後，PSG球迷经常喺比赛中嘘美斯，表面上不满佢表现，实际上可能系「公报私仇」，怨恨佢率领阿根廷喺世界盃决赛击败法国。

加上今次「三停」处罚，进一步增加美斯今夏离队机会，盛传巴塞隆拿已准备好签番呢位球王。