韦斯咸今季表现令人失望，联赛一度卷入降班漩涡，好在近期成绩有好转，喺欧协联亦杀入4强，有机会喺季尾捧盃。韦斯咸嘅复苏，同巴西中场卢卡斯柏基达有直接关系，呢位贵价球星经过大半年适应後，近期大爆发频频入波，不过领队莫耶斯仍未收货，话佢仍要证明自己唔系「水货」！

韦斯咸上年用5,100万镑(约5亿港元)向里昂收购卢卡斯柏基达，但佢嘅表现未符巴西国脚嘅地位，直到上个月突然爆发，近4场赛事有3场入波，卢卡斯柏基达表示：「我要时间适应英超嘅速度、体力化踢法，相信我依家已经100%融入，希望可以愈踢愈好，我亦好努力学习英文，正不断进步。」

莫耶斯对卢卡斯柏基达近期表现好满意，但就「挑战」佢仲未搣甩水货标签：「老实讲，好多出色球员嚟到英超後都唔系太成功，我认为柏基达仍然需要证明自己，证明自己嘅才能可以喺英超立足，希望佢近期嘅爆发只系开始。」