喺英超冲刺连番失利嘅阿仙奴，周三凌晨将会上演「伦敦打吡」，喺主场迎战车路士，「兵工厂」要保住争标最後机会，余下嘅赛事将不容有失。看守领队林柏特回巢执教惨吞5连败，成班球员无论系信心、状态、战意、实力都喺深陷谷底，阿仙奴今仗有望反弹开W。（Now 621及611周三凌晨3时直播）

阿仙奴连续4场联赛失分，加埋上场榜首大战，作客被曼城4比1击倒，争冠形势即时处於下风，不过佢哋喺联赛积分只系落後曼城1分但打多一场，喺数字上仍未绝望，相信「兵工厂」唔会轻易放弃。阿仙奴球员平均年龄系全英超第2低，喺争冠重压下表现失常属人之常情，依家普遍预料曼城捧盃已经「坐定粒六」，阿仙奴反而可以放低包袱，有助踢番最佳水准。

近5次对碰4胜

阿仙奴今季喺酋长球场出击极有保证，近5仗联赛主场4胜1和，5仗合共攻入18球，火力非常惊人。加上阿仙奴近年对车路士屡有佳作，近5次喺英超对碰，共拎到4胜1负佳绩，好有「格食格」嘅味道。

蓝战士伤兵满营

车路士自从喺3月炒领队朴达後，以为成队波会有好转，点知原来低处未算低，林柏特上任後连输5场，对上7场赛事加埋只系入得1球，「蓝战士」已经跌到落第12位，球队喺欧洲赛资格无望下，一众战将亦士无斗志；加上列斯占士、美臣蒙特、古古列拿等主力球员受伤，今仗作客酋长球场恐怕凶多吉少。