曼城前锋艾宁夏兰特今季登陆英超，即刻破晒入球纪录，令英超守衞闻风丧胆。据英国《每日邮报》统计，艾宁夏兰特有一招射门绝技万试万灵，佢今季34个联赛入波当中，有29球都系「第1时间射门」，令对手冇任何时间防范。

射手有好多种类型，好似上季金靴穆罕默德沙拿扭到飞起、孙兴民就锺意个人爆破，不过艾宁夏兰特就极少上脚，甚至连控球都唔需要，统计显示佢今季34个联赛入波，29球系「第1时间射门」，比率高达85%(当中7球为12码)，超过对上6届英超金靴，上季沙拿同孙兴民分别只有57%同52%入波系来自第1时间射门。

98年英超神射手瑟顿表示：「呢个数据有3个意义。第一，代表夏兰特有顶尖嘅走位；第二，代表佢得到非常好嘅供应；第三，代表佢充满自信，射门前冇任何犹豫。曼城为佢制造唔需要思考嘅攻门，夏兰特思路亦好清晰，称得上系足球艺术。」