曼联今季喺坦哈格带领下，表现同成绩都得到大大提升，嚟紧夏天必定继续增强实力挑战各大锦标。近日有球迷喺TikTok分享影片，佢哋喺卡宁顿训练基地外「野生捕获」坦哈格，期间有人叫佢夏天「打包」签基利安麦巴比同祖迪比宁咸，获坦哈格回应：「Why not？」

片段影到坦哈格当时揸车去卡宁顿训练基地，球迷就同佢打招呼兼吹水，有人提议曼联夏天签晒基利安麦巴比同祖迪比宁咸，坦哈格就笑笑口话：「麦巴比？比宁咸？Why not？」即时获现场球迷起哄欢呼回应：「坦哈格，我哋信你呀！」

虽然大家都知坦哈格只系讲笑，但佢嘅亲民作风就获球迷大赞，而且佢早已表明夏天会有「大动作」：「如果想曼联重拾昔日光辉，我哋需要顶尖球员，每个位置都要2个球员，因为我哋想喺每项比赛都有好成绩，呢个系要挑战最高荣誉嘅条件。」