周六(6日)晚英超，热刺主场以1比0击败水晶宫，结束过去4场1和3负颓势，前锋哈利卡尼顶入全场唯一入波，以209个入球，超越曼联名宿朗尼，成为英超史上入波第2多球员，仅次於入260球嘅舒利亚。

今仗踢到上半场补时，热刺中场柏度朴路右路传中，哈利卡尼一顶入网，终於超越朗尼，独占英超历史射手榜第2位。值得一提，呢位29岁英格兰国脚今年3月欧国盃外围赛对意大利及乌克兰都取得入球，并以55球打破朗尼纪录，成为「三狮兵团」历史射手王。

哈利卡尼唔止射术入得，而且顶上工夫一流，佢今季有10次头槌破网，成为英超史上首位单季头槌入波达双位数球员。此外，今仗入波亦系哈利卡尼第100个英超主场入波。

呢位热刺队长只剩下1年合约，盛传曼联、拜仁慕尼黑等大球会有意今夏签佢，哈利卡尼能否打破舒利亚英超入波纪录，好大程度上要睇佢仲会唔会留喺英超搵食。