祖云达斯将於欧霸盃4强首回合主场迎战「欧霸之王」西维尔，想过关并唔容易，或者需要「出奇制胜」，适逢祖记新星森姆尔伊宁近期表现大勇，随时成为今仗取胜「秘密武器」。

祖云达斯上仗意甲争前4位大战，以2比0击败阿特兰大，正选阵容出现一位陌生面孔，就系年仅19岁嘅翼锋森姆尔伊宁，呢位英格兰U20小国脚射入打开纪录1球，亦系佢职业生涯首个意甲入波。

步大力雄、技术出众嘅森姆尔伊宁自细加入车路士青年军，2020年转投祖云达斯，并喺青年军交出超班表现，上年10月意甲对安玻里，首次为一队上阵，其後欧联分组赛作客宾菲加，佢後备上阵贡献1次助攻，可惜球队输3比4，紧接联赛对莱切，森姆尔伊宁又有助攻，上年12月获续约至2025年。

森姆尔伊宁上仗意甲终於首次担任正选，并取得入球，展现强大潜力，佢今届欧霸盃亦有2次披甲，合共上阵28分钟。随住呢位天才翼锋表现愈来愈出色，预料可以获得教练阿里基重用，成为争夺欧霸盃及意甲前4位嘅重要棋子。