利物浦今季成绩下滑，季前以8,500万镑(约8.37亿港元)加盟嘅达云纽尼斯，演出不似预期，今季29场联赛只入9球，不过呢位23岁射手近日表示，佢嘅风格一向「慢热」，经过今季熟习新环境後，下季将会迎嚟大爆发！

达云纽尼斯速度、走位都一流，但系把握力就令人失望，达云纽尼斯表示：「我有好多地方要改善，例如射门技术。但系同样嘅事情都发生喺苏亚雷斯身上，喺佢嘅第2季开始就大爆发。」苏亚雷斯喺利物浦头1季半，喺英超分别只入4球同11球，但之後2季就狂入54球。

同样「慢热」嘅达云纽尼斯，自爆喺宾菲加亦有类似发展：「我效力宾菲加都有呢个情况，第1季喺我个人嚟讲非常糟糕，第2季我就爆发。喺利物浦我相信都系一样，希望下季可以交出我最好嘅一面。」达云纽尼斯20/21球季加盟宾菲加，29场联赛只入6球，但上季就28场入26球成为葡超金靴。