曼城今季展现出横扫欧洲嘅霸气，领队哥迪奥拿再次显示佢嘅领军功力，今仗大破皇家马德里，令哥帅成为史上第3位欧联「百胜教头」，同两大传奇费格逊(102胜)、安察洛堤(107胜)鼎足而立，而且哥迪奥拿只系用160场比赛时间缔造100胜，更比安察洛堤(180场)、费格逊(184场)更快达到！

今届系哥迪奥拿历来第4次进军欧联决赛，同纳比、高普、费格逊及蒙奴斯睇齐，仅次於5入决赛嘅安察洛堤，之前3次入决赛哥帅有2冠1亚，包括带领巴塞隆拿系2009年、2011年两度夺冠，2年前佢率领曼城喺决赛输畀车路士，今次希望可以帮曼城首度染指锦标。

曼城决赛对手系国际米兰，对於外界一致睇好曼城可以夺冠，哥迪奥拿就话：「喺决赛对住意大利球队会好难踢，所有人话曼城系冠军大热门，呢一样就系最危险嘅事。」