今届欧协联决赛将於捷克首都布拉格嘅幸运球场举行，费伦天拿斗韦斯咸，无独有偶，双方都拥有曾经效力布拉格斯拉维亚嘅捷克国脚，佢哋今次重返成名地争标，更加要特别落力演出，希望捧盃光宗耀祖。

费伦天拿中场安东连巴拿克、韦斯咸防守中场汤马士苏锡克、後衞华迪美高法尔都喺布拉格斯拉维亚打出名堂，幸运球场就系呢支捷克劲旅嘅主场，3人重返故地踢决赛，别具意义。

安东连巴拿克喺今届欧协联演出神勇，上阵11次射入5球及1次助攻，包括4强次回合加时最後一刻入波，协助费伦天拿惊险淘汰巴素利，若然「紫百合」夺冠，安东连巴拿克应记首功。

另一边厢，汤马士苏锡克、华迪美高法尔属於韦斯咸中後场防守支柱，遇上攻力强劲嘅费伦天拿，2人发挥对於「锤仔帮」成败有关键性影响，呢场「布拉格内战」肯定可以吸引更多当地球迷入场睇波，增强大战气氛。