阿根廷球王美斯已确定今夏约满离开巴黎圣日耳门，去向备受关注，根据美斯嘅爸爸兼经理人佐治透露，呢位即将36岁嘅射手将於周二(6日)或者周三(7日)公布加盟边一支球队。

佐治日前已同巴塞隆拿会长拉波塔见面，但会後对於美斯回巢呢支西甲劲旅，感到唔乐观：「美斯想返巴塞，我都乐见其成，但仲有待观察。」据悉巴塞隆拿因为受到薪酬上限影响，未能向美斯开出符合佢要求嘅人工，导致迟迟无法达成协议。

沙特阿拉伯豪门希拉尔愿意向美斯提供一份年薪高达5亿欧元(约42亿港元)嘅2年合约，的确非常吸引，加上佢想尽快解决前途问题，今个星期应该有定案。