曼城备战欧联决赛传出坏消息，右闸基尔获加因伤缺席周二(6日)嘅公开操练，领队哥迪奥拿证实佢受到背伤困扰，决赛对国际米兰上阵成疑。

曼城周二举行公开操练，全队球员都有份出席，唯独基尔获加缺席。哥迪奥拿喺操练完毕後向记者透露：「基尔获加个背脊出现一啲问题，佢寻日(周一)觉得唔系好舒服，今日感觉好番少少，但我哋唔想佢冒险，未来几日要继续观察佢嘅情况。」

基尔获加季中因为未能适应曼城3中坚新阵式，一度失去正选位置，但佢之後愈踢愈好，季尾已经成为球队後防必然正选，欧联4强冻结皇家马德里嘅云尼斯奥斯祖利亚，更加系曼城杀入欧联决赛嘅重要功臣，如果因伤缺阵对国米嘅决赛，对曼城会系重大打击。