新鲜出炉欧协联冠军韦斯咸，周五(9日)喺伦敦举行巴士巡游，同数万球迷庆祝球队58年来首个欧洲赛事冠军，同时亦系队长迪格兰赖斯嘅欢送仪式，韦斯咸班主大衞苏利云证实，球会已经同意迪格兰赖斯夏天转会。

韦斯咸大军带住欧协联奖盃由捷克飞返伦敦後，随即转上开蓬巴士由旧主场乌普顿公园驶去市政厅，沿途有数万球迷一齐庆祝，领队莫耶斯同队长迪格兰赖斯就最受欢迎，不过迪格兰赖斯就即将同效力9年嘅韦斯咸道别。

韦斯咸班主大衞苏利云证实：「我哋答应畀赖斯离队，佢去意已决。今季冇一个人畀佢更加投入，我哋应该如佢所愿，呢个唔系韦斯咸想见到嘅结果，我哋1年半前开20万镑(约197万港元)周薪畀佢，但佢拒绝，你唔能够夹硬留低一个想走嘅人。」据报阿仙奴日内会开价9,200万镑(约9.05亿港元)收购迪格兰赖斯，相信成事机会唔细。