周日(18日)凌晨有多场欧洲国家盃外围赛赛事，焦点当然系由C朗率领嘅葡萄牙对波斯尼亚，以及由艾宁夏兰特担大旗嘅挪威硬撼苏格兰。呢两大神锋近况弗到爆，C朗喺新帅马天尼斯领军头两仗都有「士哥」，证明自己宝刀未老；刚完成「三冠王」目标嘅夏兰特亦正式归队，大大提升挪威嘅实力。

地头龙葡萄牙速擒波斯尼亚

欧国外J组大战，葡萄牙主场迎击波斯尼亚。葡萄牙自世盃出局後，改由马天尼斯执教，球队贯彻主攻踢法，分组赛头两轮全胜兼入10球，一众新生代前锋要抢正选位置，肯定会施展浑身解数。葡萄牙主场向来抢缰，强势出击有力开出半场主胜。(周日凌晨2时45分开赛)

葡军人才济济，位置竞争相当激烈，前线仍有老将C朗拿度挂帅，佢喺马天尼斯领军头两仗都梅开二度，证明自己宝刀未老，加上干卡路拉莫斯、拉菲尔利亚奥、迪亚高祖达等新生代上位，无论边个担正都要搏尽争取表现，否则正选位置随时不保。

马天尼斯之前执教比利时都系崇尚进攻，依家喺葡萄牙有大量天才攻击手，当然会进一步采高压抢攻，尤其主场出击特别醒神。葡萄牙近7次喺主场出战，有6次都能够喺上半场领先，抢攻战术效果唔错，今场会照办煮碗。

波斯尼亚实力青黄不接，虽然阵中仲有迪斯高等星级老将，不过球队整体实力持续下滑，对上6场作客不胜，近4场作客有3场喺上半场已经落後，今仗面对气势强劲嘅葡萄牙，相信半场都顶唔住，半场主胜值博。

挪威未够班 让唔起苏格兰

欧国外A组，挪威主场迎战苏格兰。苏格兰近年成绩起飞，上轮更以2比0击败劲旅西班牙，全队士气同信心非常高昂，今仗作客有望顶住挪威进攻，佢哋近7场赛事，有5胜1和1负成绩，今场受让要捧「让客」。(周日凌晨零时开赛)

苏格兰喺小组两战全胜排榜首，入5球冇失球，表现强势，佢哋嘅好成绩并非一朝一夕，两年前出战欧国盃决赛周，虽然3战仅得1和2负，但累积咗唔少经验，之後喺世盃外小组次名出线，可惜喺附加赛输波出局，去年喺欧国联B组以6战4胜1和1负取得小组冠军，来届升上A组角逐。

佢哋多位主力都喺英超搵食，个别更系Big6队员，包括队长安德鲁罗宾臣、中场麦汤米尼，同埋基兰泰亚尼战力十足，想赢佢哋冇咁易。

挪威因为有艾宁夏兰特强势崛起，受到广大注视，可惜佢哋整体质素参差，只得艾宁夏兰特同马田奥迪加特两人撑起成队波，确实吃力，佢哋喺小组头两场只得1分，表现令人失望，最大问题系艾宁夏兰特近期出现入球荒，佢近两仗为曼城出战英足盃及欧联决赛都冇波入，明显不在最佳状态，而且国家队锋线支援同曼城相差九条街，今仗要攻破苏格兰防线将更加困难，倘若艾宁夏兰特哑火，挪威今仗更不容乐观，不宜盲目追捧。