荷兰喺欧国联4强大战克罗地亚，多年来首席前锋迪比因伤缺阵，不过领队朗奴高文赛前就表明，球队已有3大球星可以代替，其中效力利物浦嘅加普，赛前更宣布希望正式「转型」踢9号位置，仲话3大名帅都认为「9号」先系佢最佳位置。

加普喺燕豪芬以左翼起家，不过转会利物浦後被高普改造成前锋，加普亦相信呢个系佢最佳位置：「我开始相信前锋位置最适合我，希丁克系第1个叫我要踢前锋或者『假9号』嘅人，当时我唔太相信；之後罗渣舒密特都有类似讲法，但系我仍然觉得左翼最好。但自世盃同过去半年喺利物浦踢前锋，我觉得感觉好好，我想继续喺呢个位置发展，球会同国家队都系。」

喺迪比经常受伤情况下，朗奴高文表示心目中已有代替名单，包括加普、韦格贺斯同当耶尔马伦，当中以加普最受睇好，可以成为「橙衣军团」未来一段长时间嘅前锋人选。