爆出基利安麦巴比拒绝同巴黎圣日耳门(PSG)续约之後，盛传呢支法甲豪门将於今夏出售佢，以免明夏约满人财两失。不过，麦巴比喺社交网发文，表示下季仍然会留队，似乎想留番一条後路。

据悉基利安麦巴比通知会方，拒绝启动续约1年条款，意味呢位24岁法国射手可於明夏自由身离队，PSG当然唔想眼白白见财化水，计划提早今夏出售麦巴比，开价2亿美元(约15.6亿港元)，皇马、曼联成为潜在买家。

由於消息愈演愈烈，麦巴比出来澄清，喺社交网转载一篇有关於佢想今夏加盟皇马嘅报道，然後话：「我已经讲过，下季仍然会留喺PSG，我喺呢度过得好开心。」

麦巴比接受《米兰体育报》访问时，亦表示冇讲过想离队：「我从来冇话要加盟皇马或者离队，我只系通知会方，唔会启动续约1年条款，亦冇倾过续约问题。」至於麦巴比既唔续约，又声称无意离队，可能想把握最後1年合约时间，同PSG讨价还价，争取更佳待遇，甚至更大权力。不过，PSG恐怕唔会坐以待毙，仍有可能先下手为强，今夏出售麦巴比。