挪威前锋艾宁夏兰特上星期为曼城赢欧联後，展开马拉松式96小时狂欢，据报周三(14日)坐私人飞机抵达奥斯陆向国家队报到，准备欧国外迎战苏格兰嘅比赛。不过艾宁夏兰特狂欢後状态成疑，苏格兰教练亦忍唔住寸爆：「佢仲开紧P？」

曼城捧盃後嘅庆祝派对，基亚利殊同艾宁夏兰特系玩得最「癫」嘅2个，苏格兰助教卡华赛前表示：「艾宁夏兰特系咪仲开紧P？佢开P庆祝嘅次数，仲多过苏格兰出线2020欧国盃决赛周嗰阵......」可能卡华自知太寸，佢随即补镬话：「艾宁夏兰特系职业球员，佢会睇住自己，即管睇下佢落到场系咩状态，无可否认佢系个超级球员。」

艾宁夏兰特喺刚过去嘅球季为曼城入52球，不过喺佢最近9场比赛只系入过1球，脚风明显出现下滑，苏格兰今场有机会盯死呢位金靴前锋，效力布鲁日嘅中坚积亨特利表示：「我好享受同呢种级数嘅前锋较量，夏兰特嘅数据已说明一切，但苏格兰有能力制止佢入波，冇嘢系我哋做唔到。」