欧国外H组赛事，丹麦主场迎战北爱尔兰。丹麦头两仗录得1胜1负，上仗作客以2比3不敌哈萨克令人意外，反映呢支北欧兵表现并唔稳定，为避免重蹈覆辙，相信佢哋余下赛事唔会保留，倾力搏杀。北爱尔兰防线老化，恐怕难以抵挡丹麦来犯，加上丹麦近4仗3次开3球或以上，2.5球入球大值得捧场。（周六凌晨2时45分开赛）

丹麦喺H组实力明显较强，出线应该冇问题，但佢哋上场作客哈萨克，上半场凭新星贺兰特起孖领先两粒之下，可能以为稳胜而尾段有所松懈，结果被哈萨克连入3球倒输2比3，呢场波系一个教训，令丹麦以後唔会再轻视任何对手，今仗主场强阵出击，基斯甸艾历臣、卡斯柏舒米高、尤素夫保臣等球星悉数候命，相信佢哋就算早段领先，都唔会放软手脚，继续争取入球。

北爱尔兰首两仗同样取得1胜1负，不过所赢对手只系鱼腩圣马力诺，而且仅胜2比0，上仗主场则以0比1不敌芬兰，佢哋最大问题系阵容老化，两位後防主力系35岁队长庄尼伊云斯同34岁嘅卡夫卡特，经验有余活力不足，对住强阵嘅丹麦恐怕顶唔住，入球唔会少。

直播表

周五7:00pm 热身赛 南韩Vs秘鲁

周六凌晨零时 欧国外 芬兰Vs斯洛文尼亚

周六2:45am 欧国外 希腊Vs爱尔兰

周六2:45am 欧国外 丹麦Vs北爱尔兰

周六2:45am 欧国外 直布罗陀Vs法国