欧国联决赛诞生，西班牙将同克罗地亚喺周一(19日)争雄！西班牙周五(16日)喺准决赛凭老将祖斯奴完场前绝杀，2比1击败意大利晋级决赛，亦系西班牙连续第2届杀入欧国联决赛。西班牙领队富安迪喺世盃後上任，领军只系3场波就入决赛，有望极速捧盃。

西班牙今仗强阵出击，啱啱帮曼城赢欧联嘅洛迪卡斯简迪亦正选上阵，开波3分钟就有好开始，西班牙逼甩意大利中坚邦路斯脚下球，耶利米宾奴杀入禁区轻松射入。不过11分钟西班牙亦犯错，首演嘅中坚拿洛文迪禁区内手球输12码，意大利由恩莫比尼操刀追平。

双方之後互有攻守，意大利中场大衞法迪斯有入波被判诈胡，西班牙前锋艾华路莫拉达亦曾近门失机。比赛去到完场前2分钟，洛迪卡斯简迪远射省中2名意军守将，个波咁啱落喺後备登场嘅祖斯奴脚下，呢位射手把握机会攻入绝杀入球，带领西班牙赢波入决赛。

西班牙领队富安迪赛後表示：「我觉得好满足同光荣，西班牙踢出一场极高水平嘅比赛，我哋照足赛前嘅部署，球员依家士气非常高昂。」西班牙喺上届(2021年)4强亦系2比1淘汰意大利，但决赛输畀法国无缘欧国联冠军。