U21欧国盃分组赛出现极大争议，周五(23日)凌晨D组首轮赛事，冠军热门之一嘅意大利U21以1比2不敌法国U21。意大利U21今场输得冤枉，佢哋喺补时阶段曾经「入波」，但球证竟然睇唔到个波已经越过白界，喺冇VAR同冇门线技术帮助下，意大利U21嘅入波「被消失」下惨情输波。

意大利U21有大国脚辛度东拿利领军，法国U21亦有皮尔卡鲁鲁等喺意甲搵食球员，22分钟法国U21由射手卡利穆恩度入波领先，36分钟皮亚图柏历基接应辛度东拿利罚球顶入，半场踢成1比1。法国U21喺62分钟再由巴高拿建功，去到补时出现争议一幕，意大利U21守将比拿路华头槌中内柱後，被法国守将白界内用身体挡出，重播显示个波好大机会已经完全越过白界，但球证最终未有判入。

意大利U21教练尼高拿图赛後愤怒表示：「我真系唔想讲呢场波。我哋冇可能会遇到呢种球证，我觉得球证对比赛结果嘅影响太大，而且我哋亦非常冇运。意大利U21今场输畀一支好出色嘅球队，但我哋亦有好好嘅表现，值得拎到更好嘅结果。」