意大利《罗马体育报》指罗马前锋保罗戴巴拿今夏好可能离队，因为呢位29岁阿根廷国脚转投非意甲球队嘅违约金，只系1,200万欧元(约1亿港元)，属於当今球坛罕有嘅价廉物美射手，据悉车路士已经准备直接买断保罗戴巴拿。

保罗戴巴拿上年夏天以自由身，从祖云达斯加盟罗马，签约3年，佢为罗马上阵38场入18球，亦系阿根廷夺得上年世界盃冠军嘅成员，吸引其他大球会注意。戴巴拿现时合约嘅违约金分两类，意甲球队买断佢，需要2,000万欧元，其他联赛球队只需要畀1,200万欧元。

以保罗戴巴拿嘅名气同实力，呢个价钱明显好抵玩，曾经有沙特阿拉伯球队邀请佢加盟，但戴巴拿已经拒绝，车路士、热刺亦加入争夺，特别系车路士新帅普捷天奴都系阿根廷人，自然想签入呢位同胞帮手。至於罗马有意增加保罗戴巴拿人工，希望佢留队。