车路士周一(10日)官宣新球季主场球衣，采用90年代复古设计，配上金色细节同彩虹队徽，不过望落就争啲嘢，因为心口一片空白，未有心口广告。

旧心口赞助商已於上季尾约满，未有续约，车路士波衫暂时未有心口广告，会方表示，新波衫暂时仲未上市发售，英超球季开咧後都仲未有得卖，暂时所知，最快要到8月16日先会发售。

虽然未有得卖，但车路士都照做宣传，除咗搵现役几位球星安素费南迪斯、列斯占士、芝维尔、史达宁、梅迪历做模特儿，仲特别请嚟迪马堤奥同韦斯两位名宿出镜，令呢件复古波衫更有90年代气息。

今夏车路士变动可谓天翻地覆，大批球员离队，新球季波衫回到90年代，即系阿布拉莫域入主之前，返回原点重新起步，可能亦系设计呢件波衫背後嘅意思。