英格兰喺U21欧国盃击败西班牙封王，曼城本来系赛事大赢家，高尔彭马、占士查科特、沙治奥高美斯3位小将都有份喺决赛上阵，不过赛後竟然发生内讧，西班牙嘅沙治奥高美斯怒插英格兰功臣高尔彭马冇品，直指对方应该向自己道歉。

高尔彭马嘅罚球省中居迪斯锺斯入网，系英格兰U21捧盃唯一入球，入波後高尔彭马走去後备席疯狂庆祝，引发两队球员冲突，双方教练被逐，沙治奥高美斯赛後表示：「我好惊讶，高尔彭马冇好似佢部份队友咁道歉，但我哋西班牙球员肯定唔会用呢啲方式庆祝。英格兰球员已经唔系第1次咁做，就好似我哋射失12码後，佢哋都系咁样，西班牙系会尊重任何对手。」

沙治奥高美斯同高尔彭马将会喺曼城嘅季前集训再见面，沙治奥高美斯就话：「我唔肯定到时会唔会讲呢个话题，我肯定唔会要求佢道歉，如果佢想做就做，事实系佢嘅庆祝态度唔恰当。每个人都有自己庆祝方式，我哋知道英格兰就系咁样。」