继宾施马同尼高路简迪登陆沙特阿拉伯後，再有法国球星成为招揽目标，保罗普巴日前喺沙特现身，据报获伊蒂哈德开出聘约，不过消息指保罗普巴暂时无意离开欧洲球坛，希望新一季留喺祖云达斯重振雄风。

30岁嘅保罗普巴上季重返祖云达斯，但因严重受伤只系踢咗6场联赛，近日佢被影到喺吉达出现，亦有自拍影片亲证身处沙特阿拉伯。据《都灵体育报》报道，伊蒂哈德向佢开出3年总值1亿欧元(约8.58亿港元)合约，希望得到呢位法国中场加盟。

据转会权威Fabrizio Romano透露，保罗普巴已通知佢经理人同律师，新球季嘅目标仍然系为祖云达斯效力，希望可以健康比赛证明自己嘅实力，不过意大利媒体指伊蒂哈德仍未放弃，希望借保罗普巴呢之沙特之行，令佢回心转意。