前曼联门将云达沙早前去克罗地亚度假期间，突然脑出血，要用直升机紧急送往医院，入住深切治疗部留医，根据云达沙母会阿积士最新公布，呢位52岁一代名将已经冇生命危险，并可以开声同人沟通，总算大步槛过。

阿积士官方发表声明话：「跟进云达沙现时喺克罗地亚嘅最新情况，佢仍然需要留喺深切治疗部，但情况稳定，并冇生命危险，我哋去探望佢，大家可以沟通到，之後再睇下情况点样发展。」

云达沙曾经效力阿积士、祖云达斯、富咸、曼联，包括协助阿积士、曼联捧过欧联冠军，亦赢得4次英超冠军，退役之後曾经做过阿积士行政总裁，属於球坛史上最佳门将之一，佢入院之後，球坛各界人士纷纷喺社交网发文祝愿佢早日康复。