听朝墨超首循环尾场赛事，榜首瓜达拉哈拉主场硬撼尼卡沙。老牌球会瓜达拉哈拉开咧两连胜，新星约拿芬柏迪拿表现Sharp醒，加上近年交手食住尼卡沙，今场可望藉地利再下一城，主胜有计。（周五早上11时开赛）

瓜达拉哈拉於上季墨超次季後赛杀入决赛，可惜输畀堤格雷斯，屈居亚军。今季佢哋卷土重来，头两轮接连击败利昂同圣路易斯体育会，合共攻入5球，暂居榜首。其中17岁新星约拿芬柏迪拿表现突出，连续两仗都有士哥，成为瓜达拉哈拉动力泉源，上仗赢圣路易斯体育会3比1之役，左闸基斯甸卡达朗亦交出两个助攻，火力全开之下，今场胜算较高。

另边厢，尼卡沙於上季墨超次循环沦为尾二，连季後赛都入唔到，今季开咧後头两轮都和波收场，包括上仗对住迪祖亚拿，全场压住嚟攻但系不断失机，结果被对手偷袭得手先开纪录，若非末段阿伦蒙迪斯建功，连1分都保唔住，临门一脚认真麻麻。翻查纪录，双方近4次交手，瓜达拉哈拉全部赢晒，摆明格食格，1.7倍主胜捧得过。