一代钢门迪基亚不获曼联续约，以自由身离队告别12年红魔鬼生涯，震惊球坛，今夏转会市场出现多位名牌免费球星未有落班，惨成「孤儿仔」，到底呢班曾经叱咤一时嘅猛将，从此黯然退下，抑或可以再起风云，依家逐一拆解。

●沙治奥拉莫斯再拍美斯搵食？

曾经协助皇马捧过5次西甲及4次欧联冠军等锦标嘅沙治奥拉莫斯，两年前转投巴黎圣日耳门（PSG），虽然首季因伤长时间缺阵，但上季恢复水准，各项赛事上阵45场，并有4球进帐，但最终仍然不获PSG续约。

不过，呢位西班牙「带刀侍衞」始终老而弥坚，加上名气够大，盛传获得中东及美职球会垂青，当中最大机会系加盟国际迈亚密，同前PSG队友美斯再次并肩作战，以两人级数踢美职超晒班，话唔定再有盃落袋。

●古达度经验丰富续留欧洲

曾经协助祖云达斯捧过5次意甲冠军嘅古达度，今夏不获续约，结束8年祖记生涯，呢位35岁哥伦比亚国脚技术全面，可以胜任右中场及右後衞。虽然佢年龄唔细，但仍然有心有力，上季为祖云达斯各项赛事上阵47场，创下佢效力呢支意甲劲旅以来，单季最多上阵纪录。

祖云达斯之所以放弃古达度，主因系佢周薪近18万欧元（约155万港元），对於陷入财困嘅祖记而言系一大负担。古达度大赛经验丰富，仍有唔少球会对佢有兴趣，包括西甲华伦西亚、土耳其球队费伦巴治，相信佢仍有能力喺欧洲主要联赛立足。

●夏萨特可转战美职博回春

4年前系英超炙手可热巨星嘅夏萨特，2019年以1亿欧元转会费由车路士加盟皇家马德里後，足球生涯极速枯萎，频繁受伤、体重失控、状态低沉嘅恶性循环，令佢今夏落得提前解约嘅悲惨下场。

虽然只系32岁，但夏萨特畀人感觉已经系黄昏球员，喺上年世盃後退出比利时国家队嘅佢，同皇马解约後已盛传考虑提早收山，不过最近有消息指美职嘅国际迈亚密向佢提出斟介，话唔定拍住「球王」美斯喺竞争冇咁激烈嘅美国踢波，可以帮佢搵到足球生涯最後一春。

●佐迪艾巴或去掘金叹世界

效力咗巴塞隆拿11年嘅佐迪艾巴，喺球队「瘦身」同年轻化嘅浪潮下，喺5月宣布同球会提早一年解除合约。呢位西班牙球星仍处於高水平竞技状态，所以亦唔忧冇得落班，只系等佢选择下一步点行。

沙特阿拉伯同美职球会都向佐迪艾巴开出聘约，据报佢同国际迈亚密已非常接近签约阶段，佐迪艾巴去到美职後，就可以同美斯、布斯基斯及教练马天奴重新组成「巴塞帮」，对呢位老将嚟讲无疑系一个既舒适又开心嘅「退休之选」。

●沙夏拒赴中东一样唔忧嫁

「沙夏系水晶宫，水晶宫就系沙夏」，韦费特沙夏於水晶宫确系单天保至尊，之前几季护级都系靠晒佢，458次上阵攻入90球，虽然沙夏於今夏同水晶宫约满，但呢间伦敦球会开出1,000万镑（约1亿港元）年薪，希望留住佢。

不过沙夏一直冇动笔续约，因为同佢对水晶宫嘅未来目标唔明确有关，唔想年年都护级。有指佢已拒绝来自沙特阿拉伯球队嘅3,000万镑年薪报价，除咗巴黎圣日耳门，亦有意甲球会拿玻里、拉素以及土超嘅费伦巴治，向佢送上合约，真系皇帝女唔忧嫁。

●张伯伦有机会留喺英超

阿历士张伯伦名副其实系「容易受伤的男人」，自从2017年从阿仙奴转投利物浦後，过去6季只为红军披甲146次，平均一季只上阵廿多仗，加上佢伤下停下，从未融入球队，今夏约满离队，并唔意外。

不过佢始终系自由身，唔使畀转会费，据报张伯伦已收到多间英伦球队嘅报价，而阿士东维拉亦有同佢进行谈判，更有指佢同朋友讲希望喺今个月头加盟呢支老牌球队，但来到月中都未见声气，亦唔排除会转战沙特。

●连格状态大跌未有着落

连格开头喺曼联发展唔顺利，不停被外借，直到2016年先慢慢融入球队，但始终唔能够抢到正选，韦斯咸喺2021年冬季转会窗向「红魔鬼」借入呢名英格兰前锋，喺莫耶斯麾下上阵16场入9球交出5个助攻，一度令佢重返「三狮兵团」大军。可惜2021年夏天重返曼联就无以为继，并於2022年以自由身加盟诺定咸森林，签约1年，据闻佢唔拣韦斯咸嘅原因系贪钱，因为森林畀佢嘅周薪高达8万镑，再加12万镑浮动奖金。

不过，连格喺森林交唔出身价，全季联赛0入球0助攻，约满就被放弃，虽然佢自己放声气话唔排除去沙特掘金，但依家都未有消息讲过有任何球会出价，或者连格嚟紧可以专心打理佢名下嘅时装品牌JLingz。

●卢卡斯莫拉拟加盟沙特Big４

2013年1月由圣保罗转投巴黎圣日耳门後，卢卡斯莫拉连续4季捧锦标捧到手软，法甲、法联盃及法超盃各4次，法足盃3次，但2017/18年失去正选位置就跳糟热刺。

卢卡斯莫拉有速度之余，脚法亦细腻，系2018/19年球季热刺杀入欧联决赛最大功臣，当年4强次回合，热刺作客阿积士一度落後0比2，卢卡斯莫拉後备上阵大演帽子戏法，助球队两回合打成3比3，热刺以作客入球优惠进身决赛。不过随住伤患困扰，加上热刺中场争位激烈，不获球会续约。之後曾经传出水晶宫有意收留，但只闻楼梯响，最近有巴西记者指，沙特其中一队Big 4有意签入卢卡斯莫拉，或者系呢名中场最後归宿。