英超列强季前热身赛如火如荼，今日黄昏时间喺珀斯就有场英超对决，由热刺同韦斯咸交锋。热刺今季重整旗鼓，今场系澳洲领队普斯迪高路上任後第一击，佢已扬言要将热刺改造成进攻球队，今仗面对残阵嘅韦斯咸势必火力全开，预计会出现大量入球。（HOY TV 76台周二下午6时直播）

热刺今次澳洲之旅有唔少新面孔，进攻中场占士麦迪臣、翼锋沙洛文有望首度披甲，配合暂时仍然留队嘅哈利卡尼同孙兴民组成进攻线，牌面上都吓到人。

不过热刺防线仲未执妥，法国门将洛里斯因为倾转会未有随队，新加盟嘅意大利门神古里莫维卡里奥把关，未能予人信心。

热刺之前由摩连奴、干地等执教，都系以防守为战术基础，不过普斯迪高路嘅风格以进攻为先，战术会改用主攻嘅「433」阵式，今场喺澳洲球迷支持，热身赛冇包袱下肯定会大踢进攻足球，入球将会不断出现。

韦斯咸日前宣布卖走队长迪格兰赖斯，但球队仍未补充战力，阵容颇为不整，21岁中坚雷沙奥上场担正但系摆乌龙，韦斯咸「有前冇後」下仍以6比2大破澳职嘅珀斯光辉，查洛保云等攻击球员状态唔错，相信会同热刺驳火。