周日凌晨上演一场重量级热身赛，由阿仙奴喺美国中立场对曼联。两队近年交手都多波入，近4次对赛全开4球或以上，两队今夏都有扩军，今次喺集训相遇，试阵之余都想争取入球，相信今场「仙魔会」又会上演入球骚，锺意睇入波嘅球迷就要捧场。

（周日凌晨5时开赛）

阿仙奴早几日已经到埗，首站同美职明星队交手，结果大胜5比0，新加盟嘅祖利安添巴同迪格兰赖斯呢对「添饭」组合都有落场，另一新兵夏维斯更取得加盟後首个「士哥」，另外加比尔捷西斯、李安度杜沙特、佐真奴、加比尔马天尼利均有进帐，全队演出获得好评，今场对曼联系佢哋美国集训第2站，预期各球员状态有所提升，表现会更抢缰。

曼联大军日前先至飞到纽约，新加盟嘅门将奥拿拿已完成签约，并赶及同球队会合，至於另一新兵美臣蒙特喺较早前已经踢过两场热身赛，分别击败列斯联同里昂，相信已适应球队打法。

其余红魔主力已抖暑完毕，预计都会落场，包括新队长般奴费南迪斯同刚续新约5年兼大幅加薪嘅拉舒福特，将会分外卖力争取「开斋」，今场预会多波入。