纽卡素飞去苏格兰，同格拉斯哥流浪拍跳，呢场系格流41岁门将麦基哥告别赛，预计「喜鹊」都唔会搞寸个Party，而格流亦有大批球迷欢送呢位球会传奇，球队都会尽力演出，相信呢场波都系大家开心，和气收场。

■（周三凌晨2时45分开赛）

麦基哥2001年喺格拉斯哥流浪出道，踢到2012年离队，去过比锡达斯、侯城同卡迪夫城，喺2018年再度重返母会，踢到上季结束就退休，佢帮格流攞过4次联赛冠军、4次苏足盃、6次联赛盃，2008年同2022年欧霸入到决赛。

照常理，呢类表演赛会系咁入波，不过由於告别嗰个系门将，纽卡素又无理由系咁射爆人哋。事实上，格流都要争取表现，上季由云邦荷斯执教搞唔掂，11月由米高比利接下烂摊子，苏超屈居第2、联赛盃决赛输波、苏足盃就4强止步，今场对英超球队，都希望踢得好好睇睇。

纽卡素受伤兵困扰，门将尼克普比、後防查马李维士、拿修斯、中场祖尔韦洛克都未能随队，上仗首场热身赛斗非联赛球队盖茨黑德半场都落後0比2，虽然最後反胜3比2，但今场肯定会醒定啲，预计新加盟嘅辛度东拿利，以及踢国际赛延迟报到嘅般奴古马雷斯会後备上阵，呢场畀面派对相信到最後都会和波收场，为大家制造一个美好回忆。