上季异军突起嘅阿士东维拉，今夏喺艾美利领导下继续大展拳脚，据报佢哋同利华古逊达成协议，将以4,300万镑(约4.3亿港元)收购法国翼锋穆沙戴亚比，打破维拉2年前4,000万镑(约4亿港元)签贝安迪亚嘅转会费纪录。

据转会权威Fabrizio Romano报道，维拉同沙特球会艾纳斯都愿意支付4,300万镑转会费，所以决定权落喺穆沙戴亚比手上，呢位24岁翼锋最终选择去英超搵食。穆沙戴亚比曾9次代表法国国家队上阵，上季喺德甲有9个入波同8次助攻，技术全面。

新球季会踢欧协联嘅维拉，今夏已经签入比利时中场泰利文斯同西班牙中坚柏奥托利斯，依家再获穆沙戴亚比加盟，前、中、後三线实力大大增强，有望向英超列强发出强力挑战。