北美足球历史性时刻周六(22日)朝早出现，阿根廷「球王」美斯首次为国际迈亚密上阵，佢喺54分钟後备登场，表现相当抢镜，最後更喺补时最後一刻射入精彩罚球，带领国际迈亚密喺北美联赛盃2比1绝杀蓝十字，「荷里活式」嘅首演剧情真系做戏咁做！

周六开打嘅北美联赛盃系美斯登陆美职後首演舞台，班主碧咸亲临观战，勒邦占士、阿古路等体坛巨星亦有入场，美斯同布斯基斯今场先任後备，国际迈亚密喺完半场前由罗拔泰莱入波领先。全球注目一刻喺54分钟出现，美斯同布斯基斯齐齐後备登场，令全场球迷为之疯狂。

美斯以中场自由人身份上阵，掂波机会极多，不过墨西哥球队蓝十字整体能力较国际迈亚密高，65分钟由乌利尔安度拿追平。美斯频频发动攻势都无功而还，去到补时2分钟嘅最後一刻，美斯喺禁区顶博到罚球，佢亲自处理轰入招牌罚球，戏剧性带领国际迈亚密赢波。

美斯赛後表示：「我知道我一定要射入，呢个罚球系全场最後一脚，呢场胜仗非常重要，今场系一项新赛事嘅展开，今仗令我哋更有信心继续前进。」入波後兴奋到眼湿湿嘅碧咸亦表示：「老实讲当个罚球出现，我知道结果局会系咁。今晚所有人都好兴奋，大家都想亲眼见证美斯落场，喺球场内目睹呢一切系梦想成真。」