皇马美国集训首站反胜AC米兰之後士气高昂，上仗为皇马攻入绝杀入球嘅云尼斯奥斯祖利亚更系分外抢缰，佢喺集训期间特别进行12码练习，想做皇马嘅12码刽子手。

《马卡报》报道，云尼斯奥斯喺美国集训期间苦练12码，每次练习都由助教指导，耗时约10分钟，所谓功多艺熟，佢嘅12码技术定必有所提高，成为球队12码刽子手亦指日可待。

皇马嘅12码刽子手过往分别系C朗、沙治奥拉莫斯同宾施马，上述3人已先後离队，宾施马离队之後，皇马都需要安排合适人选主射12码，难得云尼斯奥斯愿意挺身而出，痛下苦功训练，相信安察洛堤会畀机会佢。

云尼斯奥斯过往并非12码刽子手，上季所有入球，包括西甲10球、欧联7球、世冠盃3球及西班牙盃3球，全部都唔系12码，新球季如果由佢操刀，相信佢嘅入球数字将会大幅上升。