周日(30日)朝早美国上演重量级热身赛，巴塞隆拿喺「国家打吡」以3比0大破皇家马德里，虽然最後比数相当悬殊，不过两队踢落其实势均力敌，如果唔系门框5度挡出皇马嘅攻门，包括云尼斯奥斯祖利亚3次中楣，巴塞可唔可以赢到都系未知数。

巴塞喺15分钟由奥士文尼迪比利先开纪录，5分钟後皇马博到12码，云尼斯奥斯祖利亚操刀射中门楣。皇马之後继续主攻，云尼斯奥斯祖利亚攻门再次中楣，祖迪比宁咸头槌再顶又中柱。换边後门框继续同皇马作对，曹亚文尼劲射中楣，巴塞喺85分钟由小将费文建功拉开到2比0，云尼斯奥斯祖利亚随後上演「门楣帽子戏法」，巴塞就喺补时由费伦托利斯埋斋赢3比0。

皇马教练安察洛堤赛後表示：「我哋今场踢得好好，无论有波定冇波都可以制造机会，唯一唔好只系个战果，一场波中5次门框系好奇怪，我谂系我踢波以来第1次经历，不过我宁愿喺季前发生！」