曼联周一(31日)朝早喺美国之旅最後一站，2比3不敌德甲劲旅多蒙特，喺美国踢4场热身赛1胜3负，成绩未如理想。曼联今场後防连环送礼，新加盟嘅门将奥拿拿一度忍唔住爆Seed，向住「前队长」哈利马古尼破口大骂，呢一幕令唔少曼联迷拍手叫好！

曼联上半场形势占优，达洛治24分钟禁区外放冷箭先开纪录，但完半场前突然送大礼，班顿威廉斯同域陀连迪路夫1分钟内各自出错，令当耶尔马伦闪电连轰2球，曼联半场由领先变落後1比2。下半场曼联用奥拿拿代替汤希顿把关，点知几分钟就几乎再输，全靠奥拿拿神勇救出对手近门施射，奥拿拿随即嬲到冲去对住哈利马古尼狂闹，唔少网民见到後留言：「曼联就系要呢啲门将闹醒班後防！」

52分钟曼联凭安东尼马菲奥斯远射追成2比2，不过防线始终靠唔住，60分钟守角球靠门楣救番一命，但70分钟走甩尤素法莫高高，被对方近门射入，曼联最终以2比3落败。曼联下周六(5日)会返主场同朗斯踢热身赛。

曼联领队坦哈格赛後不满表示：「原本系场好精彩嘅比赛，但突然间送2个大礼，咁样犯错令人困扰，最後半个钟头系踢得好差，完全冇跟从战术，冇压逼、冇组织，只系11个个体企喺球场，咁嘅表现系唔可以原谅，就算只系热身赛都唔得。」