曼城中场贝拿度施华嗌离队讲足成季，只要巴塞隆拿完成手续就会过档，但巴塞实在唔争气，近期因财政问题又出事，西班牙传媒指出，B施华顶尽等埋今个礼拜，巴塞再冇行动，就会接受曼城续约留队。

巴塞近日再出现财务同工资问题，连刚过档嘅根度简都未能注册，签贝拿度施华就更加无法完成，《世界体育报》报道，消息人士指B施华最多等到周五(11日)，亦即英超开锣日曼城作客般尼，到时佢就会决定自己未来，如果未能过档巴塞，就会同曼城续约。

过去一段时间，曼城对B施华有意转会采取寛容态度，哥迪奥拿虽然希望留住呢位中场大将，但并无阻止，蓝月会方更有诚意地提供一份世界级合约，反而巴塞只能向曼城提出借用及买断条款，人工待遇更加无法同曼城相比，再睇埋根度简现时嘅情况，B施华过档巴塞可谓机会渺茫，而且哥迪奥拿已经用行动证明，畀佢喺社区盾踢足全场，因此呢位葡萄牙留队机会相当高。