曼城翼锋马列斯已经离队，根据英国传媒爆料，「蓝月亮」主帅哥迪奥拿正在物色代替人选，包括睇中水晶宫新星米高奥利斯，力争以3,500万镑(约3.5亿港元)收购呢位21岁法国小国脚。

其实米高奥利斯曾於2016年喺曼城青年军受训，其後转投雷丁，2年前加盟水晶宫，近2英超上阵63场入4球。呢位左脚仔代表作一定系今年4月英超对列斯联，贡献3次助攻，协助球队大胜5比1，成为英超史上最年轻单场有3次助攻嘅球员，全季联赛累积11次助攻，属於水晶宫史上首位做出呢个壮举嘅球员。

由於米高奥利斯同水晶宫嘅毁约金仅3,500万镑，呢个价格对於曼城而言只系湿湿碎，问题系阿仙奴、车路士早已经对佢虎视眈眈，曼城要签入米高奥利斯，必须同呢2支伦敦劲旅拗手瓜。