白礼顿高价卖走摩西斯卡些度，嚟紧将要买中场补充人脚，消息指佢哋睇中19岁里尔喀麦隆中场巴列巴，身价只系500万欧元(约4,280万港元)，连卡些度零头都冇。

车路士抢赢利物浦签下摩西斯卡些度，转会费系破英超纪录嘅1.15亿镑(约11.5亿港元)癫价，但其实卡些度两年前只值360万镑(约3,600万港元)，海鸥赚咗一大笔之後，依家准备入货。

转会专家罗曼诺报道，白礼顿最新猎物巴列巴，系里尔青训产品，上季获提拔上一队上阵19场，交出两个助攻，依家已经同里尔展开谈判，但估计交易唔会咁顺利，因为白礼顿近两季喺转会市场赚钱太疯狂，任何球队都想分一杯羹，今次同里尔倾条件，相信要付出更大代价。