沙卡轰世界波 阿仙奴险胜森林响头炮
2023-08-15 来源: 八一体育 点击
周六(12日)晚英超首轮头场,上仗勇夺社区盾嘅阿仙奴延续强势,凭两位青训产品尼基迪亚同布卡约沙卡各省一粒,喺主场以2比1击败诺定咸森林,旗开得胜。
阿仙奴今季全面推行电子门票,但因为个系统出咗问题,搞到赛前仍有大量「厂迷」入唔到场,被迫延迟半个钟先开波。阿仙奴主帅阿迪达再次变阵,上仗社区盾试用夏维斯客串前锋,呢位德国国脚今仗都系正选上阵,不过箭头位改由尼基迪亚担任,而啱啱从阿仙奴加盟森林嘅门将马特瑞纳,立即倒戈。
一开波森林立即获得黄金机会,可惜突破越位嘅班伦庄臣射高,之後阿仙奴围住嚟攻,26分钟加比尔马天尼利於左路突破,想用施丹式转身过人不成,反而无心插柳变咗後脚靓交,畀「小偷」尼基迪亚快射近柱得手,先开纪录。32分钟轮到布卡约沙卡喺右路,扣大位起左脚轰入世界波破网,完半场前贵价新兵迪格兰赖斯远射被救出,阿仙奴领先两粒返入更衣室。
易边後冇耐阿仙奴收到坏消息,上半场已经伤伤哋嘅左闸祖利安添巴,都系捱唔住被迫退下火线,由富安健洋入替,而「兵工厂」亦明显收油,82分钟佢哋一次角球攻势失败,反而畀到森林打反击,艾兰加快送後横传,艾禾尼尔门前撞入,但最终阿仙奴仍赢2比1,喺今季联赛首仗打响头炮。
相关阅读
- 08-15希拉尔加码2年肥约 尼马即将体测
- 08-15传热刺抢卢卡古顶卡尼 球迷怨声载道
- 08-15追杀利物浦 车路士再抢拉维亚
- 08-15白礼顿准备入货 睇中里尔小将
- 08-15剧情大反转!麦巴比解冻复操或续约
- 08-15维拉斟新托迪 先借後买
- 08-15强化版曼联深夜登场 主场强「细」迎狼队
- 08-15马古尼转会继续拖 坦哈格:唔够争就走啦!
更多>>精选阅读