曼联上仗英超0比2不敌热刺，前锋拉舒福特疑似不满被换走，拒绝同教练团成员握手，返到後备席更加发脾气掟物件，担任评述嘅曼联名宿坚尼批评佢今场表现似细路仔。

当时踢到85分钟，曼联主帅坦哈格用安东尼马迪尔入替拉舒福特，呢位英格兰国脚离场後，有1位曼联教练团成员伸手想同佢握手，但「福仔」却唔理会，返到後备席仲发脾气掟嘢，队友阿历真度加拿都被吓亲，唔敢出声。

至於坚尼毫不客气批评呢位後辈：「拉舒福特喺场上表现，就好似小朋友，根本冇威胁。」由於新加盟中锋贺兰特有伤在身，踢惯左翼嘅拉舒福特开季2场都要踢中锋，可能因而未能发挥出水准，难怪愈踢愈躁。