曼联早前发表声明宣布放弃「家暴前锋」格连活特之後，盛传由利物浦名宿谢拉特执教嘅沙特阿拉伯球队伊蒂法克准备签入佢，但根据英国《太阳报》爆料，艾纳斯巨星C朗有可能要求沙特联赛赛会禁止呢21岁前红魔鬼队友去当地搵食，皆因格连活特曾经寸C朗转战沙特联赛，等於足球事业已玩完。

C朗上年年底落实加盟沙特豪门艾纳斯，获得总值3.5亿镑(约35亿港元)嘅2年合约，令唔少球员非常羡慕，但格连活特不以为然，曾於今年3月声称C朗转投沙特联赛球队，球员生涯「已死」。消息人士指C朗得知该番言论後，非常愤怒，所以传出伊蒂法克想签入格连活特後，呢位葡萄牙国脚有可能要求沙特联赛赛会阻止交易。

事实上，两人早有牙齿印，C朗两年前重返曼联後，传出格连活特不满佢加盟，令自己上阵时间减少。C朗亦曾经公开批评曼联年轻球员唔听话，对佢哋好失望，被指系讲紧格连活特，加上今次事件，睇嚟C朗同格连活特真系势不两立。