车路士过去1年疯狂买人，一线队计埋外借球员一度去到接近50人，冗员太多嘅其中一个问题，就系连领队都未必识得晒所有人！普捷天奴日前被记者问到点睇今季外借归队嘅马兰沙亚，点知普捷天奴竟然唔知马兰沙亚系乜水，认真惨情。

24岁嘅马兰沙亚喺3年前加盟车路士，虽然其中2季外借去波图同摩纳哥，但假假地都拎紧10万镑周薪，今季结束借用正式回归。车路士上场3比0大胜卢顿後，有记者问普捷天奴2名边缘球员情况，一个系马兰沙亚，一个系季前热身有上阵嘅青年军门将占美甘明，估唔到普捷天奴竟然唔识佢哋。

普捷天奴错愕表示：「边个？边个嚟？我的天呀！马兰沙亚同埋占美？我唔知可以同你讲乜，因为你呢条问题吓亲我，我哋讲紧卢顿场波。」有网民抽水表示：「车路士买人多到连领队都唔记得」、「马兰沙亚可能只系虚构出嚟嘅人」、「可怜嘅马兰沙亚」。