正喺英国备战23/24年球季嘅傅家俊，喺社交平台分享去咗曼联奥脱福嘅短片，原来Marco获Now TV邀请，今晚（26日）同谢德谦齐齐入奥脱福睇波兼做场边直播。

Now TV更特别安排Marco及谢德谦，双双联同家人於大战前，展开一次奥脱福之旅。佢哋喺比赛前一天，到曼联训练基地参观球队集训，兼先去奥脱福球场内外打个靓卡。

Marco一直系曼联Fans，亦都睇过多场曼联比赛，但原来今次先系佢首次踏足奥脱福，所以心情兴奋，今次带同小朋友一齐睇波，佢仲同囡囡讲述自己喜欢曼联嘅原因，将睇波变成亲子活动。

Marco更透露原来好多桌球手都系球迷，例如罗拔臣捧车路士、佩利热爱阿仙奴等，闲时球手相遇都会讲波经，期望有机会跟其他球手，分享今次奥脱福之旅嘅难忘经验。至於阿谦就期待可以睇到曼联操练，他更认为奥拿拿系近年难得积极同主动嘅门将，风格近似纽亚，前途无可限量。