白礼顿天价出售摩西斯卡些度畀车路士後，日内将有新血补充，就系来自里尔嘅19岁喀麦隆中场巴列巴，据报里尔知道白礼顿有钱，转会费抬高到2,500万镑(约2.47亿港元)。

转会专家罗曼诺报道，巴列巴已接受白礼顿体检，交易即将完成，转会费2,500万镑，签约5年至2028年，有1年延长合约条款。

巴列巴上季加盟里尔，上阵23场交出2个助攻，佢喺德国《转会市场》身价只值500万欧元(约4,250万港元)。

白礼顿以1.15亿镑(约11.5亿港元)出售摩西斯卡些度後，过嚟斟巴列巴就遇上里尔坐地起价，白礼顿加价到2,300万镑都倾唔掂，最终齐头畀够2,500万镑，似乎白礼顿呢两季太好生意，佢哋收购球员都要交「白礼顿税」。