利物浦上场联赛2比1反胜纽卡素，不过队长华基尔云迪积克(VVD)就惹祸上身，佢上半场食红牌後一度拒绝离场，而且爆粗辱骂球证。前英超球证希斯表示，呢位利物浦新队长做咗最坏嘅榜样，应该要被停赛4场，最後判决会视乎球证赛後报告点写。

今季接替佐敦轩达臣做队长嘅VVD，对纽卡素一仗因踢跌单刀嘅阿历山大伊沙克被逐，呢种技术犯规原本只系停赛1场，但VVD就拒绝接受红牌判决，足足花咗2分28秒先离开，期间爆粗闹球证约翰布鲁克斯，去到场边又同第4球证鲍臣争执。

前英超球证希斯表示：「VVD向队友、球迷、小朋友传递最坏嘅讯息，视乎赛後报告，VVD嘅停赛应该会增加，除咗本身红牌停赛1场，佢嘅行为本身就值得拎另一张红牌，即系停赛3场。虽然佢冇同球证有身体接触，但行为嘅恶劣同上季阿历山大米祖域推球证冇分别，英格兰足总要严厉执法。」