自从保方退出国际赛舞台之後，意大利国家队近年正选门将位置一直由基安卢基当拿隆马占据，但依家面临一位劲敌，就系热刺门将古里莫维卡里奥，呢位26岁钢门原本名不经传，但早前英超对曼联，屡救险球，一战成名，保方都话要多啲留意佢表现，睇来古里莫维卡里奥有机会喺意大利国家队上位。

古里莫维卡里奥过去2季效力意甲弱队安玻里，有唔错表现，上年9月首次入选意大利名单，出战欧国联赛事，但并冇份上阵。热刺今夏签入古里莫维卡里奥，代替老将洛里斯，球迷原本对呢位新兵冇乜期望。不过，古里莫维卡里奥对曼联一役，表现如有神助，有6次成功扑救，38次传波有35次成功交畀队友，成为热刺零封红魔鬼嘅功臣。

保方都有留意古里莫维卡里奥表现，佢话：「我想继续观察佢未来嘅发展。」保方早前宣布挂靴之後，加入意大利国家队担任代表团主管，加上新领队史巴列堤有意试用更多新人，身高1米94嘅古里莫维卡里奥只要保持对曼联一役嘅水准，有机会威胁到基安卢基当拿隆马嘅正选位置。