周一(28日)嘅巴甲上演有趣一幕，效力甘美奥嘅乌拉圭前锋苏亚雷斯，喺比赛中除鞋投诉被对手犯规，点知对方竟然直接执起只鞋掟出场外，最终「多手」嘅高士路球员食黄牌，搞笑片段被网民疯传。

呢场甘美奥对高士路嘅赛事，苏亚雷斯喺29分钟就先开纪录，去到完半场前一刻，苏亚雷斯喺边线被撞跌，但球证并冇吹罚，佢即刻碌晒地咁投诉，期间将右脚波砵Fing甩，示意佢被对手踩到，点知高士路左闸马隆行过，顺手就执起只鞋掟出场外，激到苏亚雷斯鞋都唔着就弹起身走向球证投诉，最终球证出示黄牌警告马隆。呢场波甘美奥最终大胜3比0。

呢段影片亦引起极大回响，唔少食花生网民都觉得小动作多多嘅苏亚雷斯唔抵帮：「恶人自有恶人磨」、「如果系我就直接掟上观众席」、「苏亚雷斯仲系冇变」、「一样系咁好火」。