热刺今夏出售射手哈利卡尼之後，被睇死更加冇机会打破锦标荒，但世事无绝对，呢支伦敦劲旅现时排英超第2位，包括上月3场联赛取得2胜1和，主帅普斯迪高路、中场占士麦迪臣分别当选英超8月最佳领队及球员，球队史上第4次同月囊括呢两大殊荣，热刺今季取得好开始，复兴有望。

普斯迪高路协助些路迪连夺2季苏超冠军後，今季加盟热刺，原本唔被睇好，因为热刺近年经过多次换帅都冇起色。不过，普斯迪高路领军功力令人眼前一亮，虽然首轮英超仅逼和宾福特，但之後连续击败曼联同般尼茅夫，踏入9月以5比2大胜般尼，球队表现愈来愈好。值得一提，普斯迪高路有份入选国际足协主办嘅2022/23年度最佳教练5人候选名单。

至於同样今季加盟热刺嘅占士麦迪臣，喺8月踢3场英超入1球及2次助攻，成为球队取得佳绩嘅功臣。另外，白礼顿翼锋三笘薰对狼队，个人表演入波，当选英超8月最佳金球，利物浦门将艾利臣比加对纽卡素，扑出对手劲射，获得英超8月最佳扑救。